Parlamentario Marco Berlis:
Diamars 16 di April 2024 ultimo, tabata tin un reunion publico riba e tema di “DIMAS,” cual reunion a wordo pidi pa fraccionan di MAS y AVP. Supuestamente fraccionan kier a cuestiona e maneho di minister Glenbert Croes, sinembargo manera Marisol Tromp a lanta para pa duna su betoog, su intencion tabata bisto. Marisol Tromp no a duna minister Glenbert Croes un chens pa contesta pregunta sino a sali cu un mocion di desconfiansa contra e minister. Sinembargo e berguensa cu Marisol a sufri durante e reunion publico a keda plasma pa su mesun coleganan den oposicion cu a lag’e cay manera patia berde: Ni Mansur, Ni Ryçond a sostene e mocion di desconfiansa aki y asina e mocion a keda desaproba oficialmente. (12 voto contra y 8 pro, 1 abstencion.)
Marisol a pidi cabes di Benny Sevinger na 2018
No ta un secreto cu Benny Sevinger tin un “appeltje te schillen” cu Marisol, y a entrega keho di corupcion contra Marisol Tromp na OM. Esaki ta probablemente pasobra cu dia 30 di Maart 2018 Marisol Tromp a skirbi un articulo den prensa pa exigi Benny su cabes riba un plato y a boga pa su caso di corupcion wordo trata mas lihe cu ta posibel! Den e articulo Marisol ta expresa di e forma aki:
· Un mocion di Parlamento na 2018 ta pidi Gobierno pa laga haci un investigacion (forensico) den DIP riba tur iregularidad den otorgamento di tereno pa cas y comercial durante gobernacion di e ex minister Benny Sevinger.
· Tambe Marisol a pidi pa investiga e toewijzing di e casnan na Seroe Colorado, investiga con ex Minister Sevinger a malusa e clausula di maatschappelijk investering y pa entrega keho a base di e iregularidadnan cu ser haya y asina tin mas acusacion di Marisol contra Benny den e articulo.
Marisol ta pidi Benny Sevinger pa vota pe mocion di desconfiansa
Conociendo tur e hechonan aki, Marisol tabata tin e curashi pa pidi Benny Sevinger, condena aña pasa pa corupcion, pa e sostene e mocion di desconfiansa pa supuesto “falta di integridad” di Minister di Labor Glenbert Croes! B’a acusa, b’a pidi investigacion forensico contra Benny, b’a masacra, entrega un denuncia oficial contra dje, hues a condene pa soborno, anto awo b’a core bay cerca dje pa sostene un mocion pa “falta di integridad?” Un muher sin wes’i lomba y sin principio!
Minister Glenbert Croes presentando progreso di su maneho cu prueba
Despues cu minister di Labor a presenta masha hopi documento di prueba di e progreso cu DIMAS a haci ultimo dos aña, inmediatamente e tono di oposicion a cambia. E documentonan di e progreso di DIMAS aki a wordo entrega na cada Parlamentario cualnan den gran mayoria a desecha e mocion di desconfiansa!
Ainda falta hopi mehoracion den DIMAS
Mester bisa cu Minister di Labor mes a subraya cu falta mas cos ainda pa mehora e departamento. Mester traha riba e amabilidad, servicio y rapides di documentonan ricibi. Remarcabel ta keda cu 84% di tur documento a wordo procesa y finalisa caba. Tin un cambio positivo den DIMAS pero sigur ainda falta! Nos ta spera di wak DIMAS conberti su mes den un centro eficaz cu por duna e mihor servicio na tur su clientenan!
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!