top of page

OPOSICION MINORITARIO UN BIAHA MAS A DEMOSTRA DI NO POR PARA PA BIENESTAR GENERAL DI NAN PAIS

Y NOS HENDENAN


Parlamentario drs. Shailiny Tromp-Lee:

Den un reunion publico dia 22 di augustus 2023 Gobierno di Aruba a bin duna splicacion di unda nos ta para awor pa loke ta trata e refinanciamento di e fiansa relaciona cu COVID-19 y alabes duna informacion riba e condicion mara na esaki, esta e RAft. RAft ta e ley di consenso di Reino imponi pa Hulanda cu mester reglamenta supervision financiero pa Aruba.

Un biaha mas e presencia di oposicion tabata marginal. Di 10 miembro ta 3 a 4 miembro tabata presente den sala di Parlamento henter reunion. En total 9 miembro di oposicion a papia pero sigur no tur tabatin e decencia di ta den sala ora Gobierno a contesta nan preguntanan, a duna splicacion, y/ of a coregi nan critica of mentira.


Durante reunion un cantidad di barbaridad a keda treci padilanti door di oposicion minoritario pa por hustifica nan lenguahe y actitud entreguista. Sigur durante di reunion mi a subraya e falta di e candela guerero cu mester tin pa por para pa bo pueblo, pa para pa lo husto, pa defende e stoel importante cu bo tin di ta un representante di pueblo. Un falta di caracter y sigur di muestra di corahe. Frasenan manera “RAft ta teribel pero necesario”, “Hulanda no ta confia Aruba mas pesey mes nos no tin otro cu tuma loke nan ta ofrece”. Comparacionnan cu diferente paisnan sin tuma e tempo pa compara e situacion den Reino mes. Pasobra si a tuma tempo pa haci esey por a conclui tambe cu nos como partner den Reino ta keda otro trata, sigur nos no ta keda ofreci condicionnan faborabel y cu berdaderamente por yuda nos pais y nos hendenan. Dicon no ta puntra dicon? Dicon no ta cuestiona e actitud aki di Hulanda? Si bo ta di acuerdo mes cu un Rijkswet di supervision, tin e decencia al o menos pa percura pa e ta uno husto y na beneficio di nos pais. Lastimamente un biaha mas nos por ripara cu no por bisti e petchi di Aruba y di bienestar general y mas bien ta pone bienestar propio (pasobra nan no tin partido) of bienestar di partido na prome lugar.


Un solo direccion e oposicion completo a bin ta concentra riba dje: ataca y desacredita Gobierno di Aruba. Tur cu e meta pa ataca, kibra y hunga politica barata di oposicion na lugar di bisti e petchi di Aruba y para pa loke ta corecto, pakico no por existi madurez politico y pa un biaha den historia di e pais aki nos por para hunto. Hopi kier lubida cu nos a caba di sali di un pandemia, hopi kier lubida pakico a presta e placa (vooral esunnan cu mas a keda yuda), hopi a lubida di e “gedwongen consensus” y situacion di “take it or leave it", tin a lubida con nan mes a grita of conseha contra di RAft. Un tristeza pa wak y scucha, esunnan cu mester sa of miho bisa sa miho, hasta na e momentonan aki kier sigui dividi y instiga, na lugar di para pa loke nan sa bon bon ta corecto.

Comments


bottom of page