Parlamentario Ricky Hoek:
Gobierno di Aruba a presenta ultimamente un plan fiscal nobo cu lo drenta na vigor riba prome di januari 2023. E plan fiscal nobo lo beneficia un minimo di 36 mil hende y comercio. E plan fiscal nobo aki ta netamente pa yuda tanto e pueblo y comercio bai padilanti den nan forza economico, di compra y di ganashi.
Deduccion di impuesto general
Entrante 1 di januari 2023, tur persona ta haya un deduccion di 30 mil florin den impuesto riba nan entrada. Esaki ta conduci cu bo lo keda cu mas di bo salario pa bo mes.
Bahada di tarifa riba impuesto di entrada
E tarifa di impuesto riba entrada (inkomstenbelasting) ta baha cu 2% pa tur hende entrante prome di januari 2023. E bon noticia ta cu bo lo mester paga menos belasting y resta mas cen pa bo mes.
Reparatie toeslag pa pensionado
Nos grandinan cu ta disfrutando di nan pensioen, lo ricibi un aumento di 45 florin adicional tur luna na reparatie toeslag. Esaki ta un total di 540 florin pa aña caminda nos pensionadonan ta keda yuda financieramente.
3% Di aumento di pensioen per direct
No obstante cu tur pensionado lo ricibi un reparatie toeslag mensual na januari 2023, e bon noticia ta cu per direct, aworaki mes, tur pensionado lo ricibi un aumento di 3% di nan pensioen.
Bahada di impuesto riba pensionadonan casa
Pa e pensionadonan cu ta casa, entrante 1 di januari 2023 e impuesto di entrada riba pensioen di pareha casa lo baha. Lo bai over na e sistema di calcula e impuesto separa. Esaki ta haci cu e cobransa di impuesto lo ta menos pisa pa e pensionadonan casa.
Winstbelasting lo baha
Cu e plan fiscal nobo aki, comercio lo conoce un bahada di impuesto di ganashi di compania. E ‘winstbelasting’ lo baha for di 25% pa 22% y esaki ta un bon noticia pa comercio, cu lo por wak un margen di ganashi mas grandi den nan compania. Asina tin mas espacio pa por inverti tambe den nan propio negoshi.
36 mil persona cu entrada lo beneficia
Un minimo di 36.161 persona cu tin entrada lo beneficia di e plan fiscal nobo. Na momento cu aña nobo 2023 habri, 36.161 persona lo no mester paga impuesto di entrada mas. E bon notica ta cu nan poder economico y poder di compra lo bai padilanti y tin mas espacio financiero.
Di e forma aki gabinete Wever – Croes II ta stimula un scala grandi di personanan di diferente nivel den nos sociedad y tambe comercio den nan poder economico.