Parlamentario Hendrik Tevreden:
Ta conoci cu na Aruba e asina yama ‘Red Tapes’ o burocracia cu ta tarda e proceso pa un persona yega na remarke pa por ehempel permiso di negoshi ta na ordo di dia. Esaki porfin a bin ta conoce un cambio. Ayera, diaranson 26 october 2022, den un encuentro publico na parlamento, e titular riba e cartera economico Minister Geoffrey Wever a duna di conoce e avancenan cu lo wordo logra den e ramo aki. Nos tur ta na altura cu tin hopi rapport cu a wordo skirbi ariba e estorbonan aki. Pa haya permiso ta tarda, bo tin di bay yen di caminda, y tin di entrega cantidad di papel. Esaki lo ta musica di pasado, segun parlamento a compronde den reunion cu a hiba cu minister Wever. Mirando cu tin un cantidad di peticionnan haci pa trece e cambionan aki, e a bira meta di minister Wever pa cumpli cu esaki.
Inversion y diversificacion
E meta di e maneho di Minister di Economia ta pa stimula mas empresarionan local y internacional pa inverti den Aruba. Y pa por logra esey tin di atende cu e caudronan legal pa logra e meta. Esey ta nifica, elimina ‘red tapes’ brinda mas actividad economico, crea mas espacio pa inversion, cupo di trabou y entrada pa caha di gobierno. Como punto di salida gobierno a scoge pa duna prioridad na inversionnan cu ta yuda na diversifica economia Arubano. Stimula e inversionnan cu ta resalta den e ‘six promising sectors’ manera ta para den rapport Repositioning Our Sails. Pero tambe incorpora e principio di sostenibilidad den e proceso. Importante pa nota ta cu inversion den centro di ciudad na playa y San Nicolas ta prioridad di gobierno. Esey ta nifica cu kier mira y lo haci pa logra haya economia crece bek den e centronan.
Digitalisacion
Digitalisacion lo ta e ingrediente principal pa logra e meta aki. Si bo no digitalisa bo no lo logra kita ‘red tapes’ asina facil. Como ehempel, awendia bo tin di bay na KVK, Censo y DEZHI esta tres lugar diferente pa bo logra establece bo negoshi. Pero esaki lo conoce un cambio, unda cu DEZHI mes cu permiso di e comerciante ta percura pa haci tur e procesonan y papeleo aki di un forma digital. Esaki lo percura pa un mihor servicio y corta e tempo di espera y di bay yen caminda pa e cliente. E cliente lo por haci su peticion den forma digital, y wordo notifica na un forma digital ora cu su peticion a ser atendi y asina cu e ta cla e lo ricibi esaki digitalmente pa por print e pa su mes. Di otro palabra di comienso te final, e proceso lo cana digitalmente, sin cu bo mester ta físicamente presente na un of otro departamento si como cliente bo ta desea esaki. DEZHI mes tambe, pa loke ta trata finalisa e vestiggingsvergunning lo baha nan tempo pa tramita esaki na un cantidad di no mas cu 10 dia di trabou.
Nos ta mira e desaroyo aki como uno sumamente positivo y nos ta kere cu e lo benificia e comerciante di hopi manera. Nos ta spera cu e lo por nifica cu mas comerciante lo haya interés pa sea legalisa nan negoshinan si e no ta ainda o lcuminsa cu un negoshi nobo usando e plataforma digital cu ta wordo presenta pa gobierno di Aruba.