Parlamentario Marco Berlis durante encuentro publico 26 october 2022:
Despues di scucha varios keho di pueblo tocante di e aumento di prijs di alimento, mi a formula e preguntanan di pueblo pa asina Minister Geoffrey Wever, Minister di Economia, Comunicacion y Desaroyo Sostenibel. Tin preocupacion bao di pueblo, sinembargo nos sa cu inflacion halto a asota tur pais globalmente. Esaki sigur alimenta pa e guera entre Rusia y Ukraina, prijs di Petroleo halto, flete cu a subi drasticamente, scarcedad di producto y tambe un economia Arubano bao presion.
Pa e motibonan aki mi a puntra Minister Wever e siguiente preguntanan;
1. Minister por duna Parlamento un rapport con frecuentemente e ekipo cu ta controla prijs di canasta basico ta sali controla? Adicionalmente, e rapport aki por contene e nomber di e negoshinan y e fechanan cu a controla esakinan?
2. Pa tur clarificacion, minister por manda mi un lista di e productonan exacto cu ta parti di e canasta basico actualmente?
3. Minister por duna mi un rapport di e infraccionan cu a wordo cometi pa negoshinan, e fecha di esakinan, e nomber di negoshinan y cuanto infraccion tin pa luna y anualmente?
4. Tin algun indicacion cu gobierno lo bay of kier introduci mas producto den e canasta basico?
5. Minister por duna mas informacion di e app di Economische Zaken cual pueblo por usa pa por monitoria e prijsnan di productonan?
6. Como Minister di Economia, cual ta minister su opinion tocante aumento di minimum loon pa 1 januari 2023?
7. Minister ta kere cu un aumento di minimum loon lo haci un impacto positivo riba nos economia? Si e contesta ta no, por argumenta esaki, considerando cu 60% di nos poblacion ta cay bao di e bracket di entrada aki?
Preguntanan di pueblo merece nan contesta y accion rapido.
Di e forma aki como representante di pueblo mi a cuminsa cana un caminda pa purba yuda bin cu ideanan pa ta parti di un posibel solucion pa pueblo den e temporada difícil aki. Ademas pueblo merece contesta riba nan pregunta y kehonan, y como su representante mi ta ocupa mi mes pa vocifera, cuestiona pero tambe aporta pa asina mi por ta un agente di solucion memey di un crisis economico global. Un representante por haci mas cu djis su trabao, y esaki ta tuma curason. Ademas di mi debernan mi ta activo den pueblo pa por asisti unda cu mi por. Pesey e simannan cu a pasa tambe mi a elabora y sugeri pa subi salario mínimo. Mi speransa ta keda cu lo considera pa por haci esaki ainda pa Januari 2023.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!