top of page

ARUBUS A MIRA E IMPORTANCIA Y MI TA AGRADECIDO PA ESEY!

Parlamentario Darlaine Guedez-Erasmus:

Diasabra 15 di october tabata dia internacional di e garoti blanco strepi cora. Manera ta conoci cu tur aña durante e siman aki Fundacion Arubano di esnan Visualmente Incapacita (FAVI) ta percura pa den luna aki haci diferente actividad den comunidad.

Aña pasa den luna di october FAVI a bini di bishita na Parlamento di Aruba y como Parlamentario mi a probecha di e oportunidad pa asina combersa cu e clientenan. Den combersacion mi a hacinan e pregunta kico ta puntonan di atencion cu nan ta desea di wak mehoracion a corto plaso y a largo plaso. Algo cu a resalta hopi ta nan gana y necesidad pa ta mas inclui den comunidad door di por ehempel ta mas independiente. Specificamente nan a menciona cu pa e parti di transporte publico nan ta haya hopi dificil pa sa ki ora nan ta yegando nan destinacion. Nan tin e deseo di por tin un guia mas mihor den e bus, pa asina sinti siguransa pa cu uso di bus tambe.


Di e forma aki mi a tuma tambe mi posicion como parlamentario pa vocifera e deseo aki na esnan concerni, unda cu durante un conferencia di prensa aña pasa mi a haci e peticion na Arubus pa fortifica e participacion di tur ciudadano den comunidad pa loke ta trata uzo di transporte publico. E aña aki den e siman di garoti blanco strepi cora, Arubus a organisa un proyecto, un experimento social, acompaña cu 12 cliente di FAVI pa un guia, pa stop y subi un bus, cual tabata dunando servicio normal. Por a mira con atento e chauffeurnan tabata ta y tambe e otro personanan den bus. Dispuesto na cada momento pa brinda apoya na e clientenan si ta necesario. E proyecto aki a fungi como prueba, pa por averigua si Arubus mester haci algun ahuste of si ta dispone di tur rekisito pa asina brinda e mihor servicio posibel pa personanan visualmente incapacita.


Como Parlamentario mi kier gradici Arubus pa mira e importancia y organisa e proyecto aki pa asina duna e personanan cu visualmente incapacita e confiansa propio pa haci uso di transporte publico. Pa termina, ta importante pa analisa e recomendacionnan y traha riba nan pa asina por ta safe pa tur persona visalmente incapacita y por core rond di Aruba manera tur otro cuidadano.

Comments


bottom of page