Dialuna prijs di bari di petroleo a baha te na prijs di esun di December 2021
Parlamentario Marco Berlis:
Ta mi custumber pa informa pueblo tur siman riba e prijs di e bari di petroleo riba medionan social. Mi ta haci esaki pa informa y tambe pa pueblo por sa kico por ser spera ora ta anuncia e bahada of subida di esaki. Siman pasa e bari di petroleo tabata na $86.17, sinembargo riba Dialuna 26 di September esaki a baha pa $77.62! Esaki ta un bahada drastico di $8.55 pa bari! Esaki sigur ta un bon noticia y lo sigura cu otro luna lo sigui baha e prijs di gasolin, diesel y kerosin. Esaki lo traduci den bahada di inflacion, menos gasto pa pueblo y comerciantenan y mas placa den cartera di pueblo. Adicionalmente e reduccion de e prijs di petroleo por significa cu gastonan di produccion di productonan, transporte di carga y flete internacional lo por baha.
E bon noticia di e bahada di petroleo aki ta, cu esaki ta nivelando te na e prijs di December 2021. Si petroleo sigui baha di e forma aki kisas e ta responsabel pa WEB Aruba NV cuminsa considera na un cierto momento pa hedge atrobe y asina cuminsa baha prijs di awa cu coriente. Si petroleo keda experiencia caidanan di $8.55 den un siman, esaki por significa cu pronto nos lo por conoce prijsnan di petroleo bao di $50. Mi ta kere cu tur hende kier esey. Sinembargo nos sa cu e mercado ta hopi inconsistente y cu prijs por tambalia pero tambe subi cu cualkier noticia. Pa awor e indicacion ta mustra un tendencia cu e prijs lo sigui baha den futuro.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!