Mike Eman su mensahe ta contradeci su accionan 100%
Parlamentario Marco Berlis:
Recientemente mi a wak AVP a manda su parlamentarionan di atake bay den prensa pa un biaha mas tira Aruba completo bao bus. Aparentemente e parlamentario aki tin informacion cu Hulanda no kier duna Aruba un KB pa gobierno su mal maneho. Ora bo scucha e tipo di declaracionan asina bo tin di cuminsa hari. Si enberdad Aruba no haya un KB ta pa su esfuerso y un bon maneho cu Hulanda lo a dicidi di no duna KB mas. Pa lunanan largo AVP a sinta gaña cu maneho di gobierno ta malo y cu ta merece un KB. Mike Eman ta decepciona cu Aruba no ta bay haya un KB. Ami no sa unda nan a haya e informacion aki pasobra ta te Diabierna Hulanda lo comunica cu gobierno si Aruba ta haya un KB of no.
E “Bon Comun” ta un “Farsa Comun” di AVP
Sinembargo e problema di AVP ta hopi mas profundo cu esaki. Pa lunanan largo AVP a organisa symposio, conferencia, reunionnan den bario, y casnan pa comparti nan mensahe di e supuesto “bon comun.” E cantica di e bon comun ta zona bon berdad pero e ta otro camuflahe di nan intencionnan berdadero. Si di berdad Mike Eman kier e bon comun aki pakico ta gaña y manipula tur dia y ta haciendo cueste loke cueste pa Aruba haya un aanwijzing? Acaso e profesor di AVP no sa ki consecuencia un aanwijzing lo tin pa Aruba specialmente den e temponan aki? Y si berdad Hulanda dicidi Diabierna pa no duna un aanwijzing na Aruba, esaki no lo ta un bon comun pa Aruba y digno di celebra? Hamber pa poder ta mas importante pa Mike Eman cu e “bon comun?”AVP no ta kere den trahamento hunto y celebra ora cos bai bon pa Aruba? AVP su mensahe y accionan ta contradeci otro fuertemente y pesey nos por solamente conclui cu e mensahe di e “bon comun” ta simplemente un “farsa comun.”
Finanzas y KB tempo di Gabinete Mike Eman v/s Gabinete Wever-Croes
Gabinete Wever-Croes a reduce un deficit di pandemia di 1028 miyon pa 25 miyon na 2023. Tin hasta posibilidad cu 2023 lo por produci un presupuesto balansa. Acaso Mike Eman a lubida con e hunto cu su minister di Finanzas Mike De Meza a sink Aruba y a redobla nos debe nacional? Mike Eman ta lubida con di 2009-2017 tur aña su gobierno a produci deficitnan inacceptabel di entre 180 miyon pa casi mei Biyon? Mike a lubida cu Hulanda mester a interveni na Aruba pa interumpi e abuso y desastre financiero cu Mike Eman tabata causa na pais Aruba? Mike a lubida cu pesey CAFT a bin na 2015? Mike a lubida cu e SI a haya un KB pa su maneho desastroso cu nunca a cambia y a haci cu te ne dia di awe a establece e presencia di CAFT? Esaki ta e bon comun cu Mike ta papiando di dje? Esaki ta e ehempel con Mike lo kier sigui goberna y e modelo “bunita” di e bon comun? Esaki sigur no tin niun sentido comun!
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!