top of page

ECONOMIA DI ARUBA A CRECE CU 5.7% DEN E DI DOS KWARTAAL

Parlamentario Marco Berlis:

Mescos cu Turismo ta kibrando tur record desde April, asina tambe Banco Central di Aruba a indica cu pa di dos trimester consecutivo nos economia a crece y e biaha aki cu 5.7% compara cu e mesun periodo di 2021. “E crecemento di 5,7 porciento den Producto Bruto Domestico (PBD) real a deriva for di e impulso positivo continuo den e sector turistico. Indicadornan di inversion y consumo a demostra un expansion den actividad economico.”

Ademas Banco Central di Aruba ta bisa lo siguiente: “E mehoracion persistente aki tabata conecta cu un subida den e cantidad total di turista y cantidad di anochi di turista, cu a hiba na un crecemento den operacion di hotelnan (Tabel 1). Den e prome mitar di 2022, Aruba a conoce un subida di 61,9 porciento den cantidad di turista compara cu e prome mitar di 2021, y a yega te na 91,8 porciento di e nivel di 2019 (pre-COVID). Un aumento den turistanan procedente di Merca (+46,5 porciento) a conduci na e cantidad halto di turista, como tambe un crecemento den tur mercado. E mehoracion den demanda turistico a causa un ampliacion den e tasa di ocupacion di hotel (+63,1 porciento) y otro indicatornan di e sector hotelero. Banda di cantidad total di turista, bishitantenan di crucero tambe a contribui na e recuperacion, registrando un crecemento di 16.481,0 porciento compara cu e aña anterior.”


Turismo, nos unico pilar economico, ta creciendo y yudando nos economia recupera hopi liher y yudando gobierno baha e deficit segun rekisitonan di RMR y CAft. E hecho cu gobierno a lora manga y a traha duro pa baha e defecit di 1028 miyon pa 25 miyon florin na 2023, ta muestra cu nan trabao ta dunando fruta. Gobierno hasta ta premira cu lo por tin un posibilidad cu lo tin un presupuesto balansa of hasta un surplus otro aña, cual por ta un logro historico y prueba rotundo di experticio, seriedad, y stabilidad di un gobierno cu ta traha incansabelmente pa e recuperacion di nos pais.


Ban sigui keda positivo y enfoca pa sigui traha duro. Hunto nos por logra cualkier cos. Hunto nos trabao, sacrificio y amor pa nos pais lo yuda nos vence tur obstaculo den nos caminda!


Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!

Commenti


bottom of page