Aporte grandi na formacion di nos mucha- y hobennan
Parlamentario Ricky Hoek:
Diasabra 15 di october ultimo a tuma lugar e instalacion di tanto e Directiva nobo y e Ekipo di Training Nacional di Scouting Aruba na Centro Juvenil Washington na Noord.
Ken ta Scouting Aruba?
Scouting Aruba ta e organisacion hubenil pa mucha y hobennan entre 5-18 aña. Tin cuatro categoria den cua ta parti e mucha y hobennan. Tin e categoria of grupo di ‘Bevers’ cu ta pa muchanan di 5 te cu 7 aña, tin e grupo di ‘Welpen’ cu ta pa muchanan di 8 pa 10 aña, despues ta haya e grupo di ‘Verkenners’ cu ta pa hobennan di 11 pa 14 aña y por ultimo e grupo di ‘Explorers’ cu ta pa hobennan di 15 pa 17 aña. Si e hobennan ta desea di sigui den scouting, e ora tin oportunidad cu e hoben por sigui cursonan di liderazgo den scouting y asina bira un lider scout.
Kico ta e rol di Scouting Aruba?
E rol cu Scouting Aruba ta hunga den comunidad ta di sumo importancia. Scouting Aruba tin un rol y un aporte grandi na e formacion di nos mucha y hobennan. Scouting ta aporta por medio di su metodo di educacion no formal na desaroyo tanto general, di auto-estima, etica, abilidad di liderazgo, abilidad di ciudadania di e mucha o hoben pa bira un ciudadano util y responsabel pa su comunidad cu capacidad di ta un lider den su propio bida y comunidad.
Boluntarismo, liderazgo y participacion civico
Mediante e vehiculo cu ta scouting, un grupo grandi di adultonan ta pone nan tempo liber pa asina semanalmente haci trabou boluntario pa hubentud di Aruba. E adultonan aki ta personanan cu tin un formacion intensivo di liderazgo cu ta wordo duna na nivel mundial pa WOSM (World Organization of the Scout Movement). Di e forma aki e lidernan aki ta pasa nan balornan y formacion di liderazgo na nos hobennan y asina ta crea y forma lidernan nobo y hoben den nos sociedad. Cu e resultado cu e mucha- y hobennan aki, lo participa activamente como ciudadano ehemplar unda cu nan bai.
Pa mas informacion di Scouting Aruba y of pa inscribi un mucha of hoben, bishita nan Facebook ‘Scouting Aruba’ pa mas informacion.
